Brekka

Austan Langár, á allfögrum stað undir fjallinu, stendur bærinn Brekka. Þar bjó Guðmundur refaskytta Einarsson til skamms tíma, en synir hans nú. Guðmundur er mesta refaskytta landsins. Hann hefir skotið á þriðja þúsund refi. Ekki hefir það verið fyrirhafnarlaust, því að á grenjum hefur hann legið samtals svo árum skiptir.

Um Guðmund er þó ekki hægt að segja, að hann hafi vanrækt bú og börn. Jörð sína hefir hann setið vel, og þjóð sinni hefir hann gefið yfir tvo tugi mannvænlegra borgara. Enn er hann ungur í anda og kvikur í hreyfingum. Hættulegur erkióvini sínum, refnum, er hann þó ekki lengur, því að sjónin er biluð. Kafli úr bókinni: Aldarfar og örnefni í Önundarfirði eftir Óskar Einarsson. Iðunn, 1951.